१०७ वर्षांची धार्मिक परंपरा आजही कायम*
आकाश पाटील*
*दैनिक लोकतंत्र*
वाशिम : जिल्ह्यात रिसोड शहरापासून अवघ्या पाच किलोमीटर अंतरावर रिसोड–मेहकर या राज्य महामार्गावर दोन तलावांच्या निसर्गरम्य परिसरात वसलेले मोठेगाव येथील श्री सिद्धिविनायक गणेश मंदिर हे विदर्भ आणि मराठवाड्यातील हजारो भाविकांचे श्रद्धास्थान बनले आहे. नवसाला पावणारा व भक्तांच्या मनोकामना पूर्ण करणारा गणपती म्हणून या देवस्थानाची परिसरात श्रद्धा आहे. या मंदिराला धार्मिक परंपरेची तब्बल १०७ वर्षांची परंपरा लाभली आहे.
मोठेगाव येथील प्राचीन हेमाडपंथी श्री रामेश्वर मंदिराच्या समकालीन असलेल्या या पुरातन श्री सिद्धिविनायक मंदिरात वर्षभर भाविकांची दर्शनासाठी गर्दी असते. विशेषतः प्रत्येक चतुर्थीला येथे भक्तांचा मेळा भरतो. विदर्भ तसेच मराठवाड्यातील विविध भागांतून भाविक श्री सिद्धिविनायकाच्या दर्शनासाठी मोठेगाव येथे येतात.
गणेशोत्सवाच्या काळात मंदिर संस्थानच्या वतीने विविध धार्मिक व सामाजिक उपक्रमांचे आयोजन केले जाते. गणेशोत्सवात भाविकांसाठी खिचडी प्रसादाचे वाटप, तर अनंत चतुर्दशीच्या दिवशी महाप्रसादाचे आयोजन केले जाते. भाविकांची गैरसोय होऊ नये यासाठी मंदिर परिसरात पिण्याच्या शुद्ध पाण्याची व्यवस्था तसेच महिला व भाविकांसाठी स्वच्छतागृहाची सुविधाही उपलब्ध करून देण्यात आली आहे.
*डव्हा येथील विश्वनाथ महाराजांच्या भाकिताची आठवण..*
मालेगाव तालुक्यातील श्रीक्षेत्र डव्हा येथील श्री विश्वनाथ महाराज यांचा मोठेगावशी विशेष संबंध होता. ते मोठेगाव येथे येत असताना श्री सिद्धिविनायकाचे आवर्जून दर्शन घेत असत. त्यावेळी त्यांनी या देवस्थानाबाबत भक्तांना सांगितले होते की, हे देवस्थान भविष्यात नावारूपाला येईल.
भव्य सभागृह उभारणीचा संकल्प
श्री सिद्धिविनायक संस्थांनच्या वतीने धार्मिक तसेच विविध सामाजिक उपक्रमासाठी भव्य सभागृह उभारण्याचा संकल्प करण्यात आला असून, त्याचे बांधकाम सध्या सुरू आहे या सभागृहामुळे भविष्यात धार्मिक कार्यक्रम, प्रवचन, भजन- कीर्तन, गोरगरिबांचे विवाह सोहळे तसेच विविध सामाजिक उपक्रमासाठी भाविकांना आणि परिसरातील नागरिकांना याची मोठी सुविधा उपलब्ध होणार आहे.
या देवस्थानाच्या विकासाचा पाया वैकुंठवासी ब्रहस्पतिनाथ महाराज यांनी रचला. त्यांच्या कार्याची परंपरा पुढे नेत संस्थानचे अध्यक्ष यांच्या मार्गदर्शनाखाली पदाधिकारी सहकारी आणि ग्रामस्थ मंडळी देवस्थानाच्या विकासासाठी प्रयत्नशील आहे.
मोठेगाव येथील प्राचीन गणेश मंदिरात गणेशोत्सवानिमित्त विविध धार्मिक व सामाजिक उपक्रम.
